Lidhje

Mustafa: Kosova në udhëkryq – rrugëdalja një marrëveshje mes pushtetit dhe opozitës


Mustafa: Kosova në udhëkryq – rrugëdalja një marrëveshje mes pushtetit dhe opozitës

Mustafa: Kosova në udhëkryq – rrugëdalja një marrëveshje mes pushtetit dhe opozitës

Kryetari i Lidhjes Demokratike të Kosovës, Isa Mustafa, i tha Zëri të Amerikës, se situata aktuale në Kosovë mund të zgjidhet më një marrëveshje politike që do të shmangte zgjedhjet e jashtëzakonshme. Në një intervistë me korrespondentin tonë në Prishtinë, Besim Abazi, zoti Mustafa thotë së Lidhja Demokratike do të bojkotojë sërish procesin e zgjedhjes së presidentit nëse partitë në pushtet nuk merren vesh me opozitën, por hedh poshtë çdo mundësi të pjesëmarrjes së partisë në pushtet.

Zëri i Amerikës: Zoti Mustafa, si mund të dalë vendi nga situata e krijuar pas vendimit të Gjykatës Kushtetuese për presidentin?

Isa Mustafa: Po ne kemi propozuar edhe më parë dhe qëndrojmë prapa një sjelljeje të tillë edhe tani, që domosdo duhet të bëhet një marrëveshje ndërmjet partnerëve që e përbëjnë Parlamentin e Republikës së Kosovës, ndërmjet partive parlamentare, në mënyrë që të gjendet një zgjidhje, sepse zgjidhje nuk ka pa marrëveshje. Çdo gjë që bëhet në mënyrë të njëanshme në situatën kur partia e cila është në pushtet së bashku me partnerët e pozitës nuk i kanë shumicën e votave të deputetëve, sepse më shumë ka deputet me vota që janë jashtë pozitës sesa ata që janë në pozitë. Prandaj, atyre nuk u takon që mënyrë të pavarur të vendosin se kush do ta qeverisë dhe kush do të jetë president i vendit.

Zëri i Amerikës: Çfarë përfshinë kjo marrëveshje dhe cilat do të ishin ato kushte tuajat?

Isa Mustafa: Kushtet elementare do të ishin përgatitjet për zgjedhjet e reja, të cilat do të jenë zgjedhje demokratike me përfaqësim të drejtë. Këto përgatitje nënkuptojnë afatizimin e ndryshimit të ligjit për zgjedhjet dhe sistemit zgjedhor. Afatizimin e ndryshimit të kushtetutës, në mënyrë që të zgjidhet problemi i zgjedhjes së presidentit të Republikës. Dhe pas kësaj, një afat optimal i shkuarjes në zgjedhje të përgjithshme, të cilat do të nënkuptonin pastaj zgjedhje për të gjitha institucionet e Republikës së Kosovës.

Zëri i Amerikës: Dhe me këto kushte do ta votonit kandidatin e koalicionit qeverisës, në këtë rast, nëse përsëritet zoti Behgjet Pacolli?

Isa Mustafa: Në këto kushte, ne do të marrim pjesë në Kuvend. Por, është e drejtë e deputetëve që ata të vendosin lidhur me votimin apo mosvotimin, sepse është e drejtë individuale e çdonjërit që të votojë apo të mos votojë, apo të abstenojë nga votimi.

Zëri i Amerikës: Por, nëse koalicioni qeverisës vendosë të çojë në parlament zgjedhjen e presidentit pa këtë marrëveshje që ju e ofroni, cili do të jetë veprimi juaj? Do ta bojkotoni sërish seancën?

Isa Mustafa: Veprimi ynë sigurisht do të jetë i njëjtë, sepse deputetët e LDK-së nuk e kanë arsye që të ndërrojnë qëndrimin, në qoftë se nuk reflekton ndryshe Partia Demokratike dhe partnerët e koalicionit.

Zëri i Amerikës: Pra, jeni të gatshëm të shkoni në zgjedhje të jashtëzakonshme?

Isa Mustafa: Gjithsesi, gjithsesi, Ne i konsiderojmë ato se janë zgjedhje demokratike dhe se zgjedhjet që do të zhvillohen në një procedurë demokratike. Dhe nuk jemi ne ata që, të themi, iniciojmë këtë ose të cilët shkaktojnë shkuarjen në zgjedhje të jashtëzakonshme. Janë ata që e kanë shkelë kushtetutën. Kushtetutën e ka shkelë Kuvendi, i cili ka vendosë për zgjedhjen e presidentit në një procedurë kushtetuese dhe ata të cilët nuk po reflektojnë gatishmëri për të gjetur zgjidhjen.

Zëri i Amerikës: Por, pushteti ju ka akuzuar edhe juve për shkelje të kushtetutës me mospërmbushje të detyrimeve të deputetëve tuaj për të qëndruar në sallë, ndërsa një kërkesë të tillë ndaj jush e kanë bërë edhe zyrtarë të lartë ndërkombëtarë. Si ju përgjigjeni?

Isa Mustafa: Këtë e ka thënë zoti Thaçi, sepse ai e interpreton ne mënyrën e vet vendimin e Gjykatës Kushtetuese, që është gjë e pazakontë, sepse është qartë e thënë se kush e ka shkelë kushtetutën dhe ai i adresohet Kuvendit dhe jo atyre që s’kanë qenë në seancë të Kuvendit. Ndërkaq, unë nuk e shoh fare nevojën që të bëhen apele rreth pjesëmarrjes së deputetëve. Deputetët janë të pavarur dhe ata e ndjejnë përgjegjësinë e tyre para elektoratit dhe para qytetarëve që i kanë zgjedhur. Dhe marrja apo mosmarrja pjesë në seancën e Kuvendit, është çështje se si ata e ndjejnë përkrahjen dhe obligimin e tyre qytetar. Në qoftë se ata janë të bindur se nuk e bëjnë një akt që është në harmoni me votën që kanë marrë nga qytetarët, nuk mund t’i obligojë asnjeri që të marrin pjesë në mbledhje. Por, në qoftë se ata janë të bindur se e kryejnë një akt me të cilin pajtohen qytetarët, është çështje e tyre që të marrin pjesë. Por, unë mendoj se kurrgjë s’ka ndryshuar deri më tani. Ne kemi përkrahjen për këtë. Sot e kam pasur edhe Këshillin Qendror të LDK-së, jemi këshilluar dhe ata i përkrahin politikat që i kemi ndjekur deri më tani dhe të cilat i ka ndjekur grupi jonë parlamentar.

Zëri i Amerikës: A ndjeheni përgjegjës për çuarjen e vendit në zgjedhje të jashtëzakonshme në një kohë kaq të shkurtër?

Isa Mustafa: Jo, nuk ndjehem fare, sepse përgjegjës duhet të ndjehen ata që e kanë shkelur kushtetutën. Dhe ata duhet të gjejnë zgjedhjen, ndërkaq ne jemi që zgjedhja të jetë demokratike, që ne të gjejmë rrugën për me dalë nga kjo situatë. Kemi treguar gatishmërinë tonë dhe mbetet në përgjegjësinë e partisë e cila mban vendin e parë dhe e cila ka propozuar së bashku me partnerët e koalicionit presidentin, që ajo të reflektojë gatishmërinë për t’u ulur dhe biseduar.

Zëri i Amerikës: Zoti Mustafa, nga analizat që i keni si kryetar i partisë më të madhe opozitare, ku vërtetë po shkon Kosova? A po shkon drejt zgjedhjeve apo megjithatë, mund të gjendet një zgjidhje brenda kësaj periudhe?

Isa Mustafa: Unë jam shume i bindur se mund të gjendet zgjidhja, sepse nuk ka një situatë e cila nuk mund të ketë një zgjidhje.

Zëri i Amerikës: Pra nuk e domosdoshme të shkohet në zgjedhje?

Isa Mustafa: Nuk është e domosdoshme të shkohet në zgjedhje, sepse, zgjidhja mund të gjendet në një bisedë, në një tryezë me partitë opozitare dhe partitë që janë në pozitë, në mënyrë që të gjendet një interes i përbashkët, në një moment i cili do të jetë optimal për ta tejkaluar këtë situatë dhe që vendi të ketë institucione, edhe qeverinë edhe presidentin e Kosovës dhe për t’u përgatitur për zgjedhjet e ardhshme, sepse këto zgjedhje ashtu si kanë filluar edhe po vazhdojnë. Sepse, kanë filluar keq dhe të gjitha refleksionet deri më tani kanë qenë të këqija. Mirëpo, ne i kemi pranuar si të tilla, për arsye se kemi konsideruar që Kosovës i nevojiten institucione dhe Kosova nuk mund të mbetet në boshllëk institucional. Kjo ka qenë oferta dhe kjo ka qenë gatishmëria dhe vullneti ynë që kemi treguar. Natyrisht, ky vullnet nuk na mungon që edhe më tutje të bashkëpunojmë, të japim maksimumin tonë, në mënyrë që demokracia në Kosovë të fitojë.

Zëri i Amerikës: Kjo zgjidhje që ju e parashikoni, pa zgjedhje të jashtëzakonshme, a nënkupton pjesë në pushtet për LDK-në?

Isa Mustafa: Jo. Ne nuk kërkojmë pjesë në pushtet. Ne kërkojmë që të bëhen përgatitjet për zgjedhje të ardhshme cilësore, për zgjedhje demokratike, në dobi dhe në përfitim të të gjithë qytetarëve të Republikës së Kosovës.

Zëri i Amerikës: Jeni i gatshëm të takoheni me zotin Thaçi për t’i diskutuar këto çështje?

Isa Mustafa: Gjithsesi, gjithsesi edhe me zotin Thaçi edhe me të tjerët jam i gatshëm të takohem. Këtë e kemi diskutuar edhe sot. E kam prezantuar këtë gatishmëri edhe më parë dhe unë mendoj se një gjë e tillë, do t’i ndihmonte daljes nga kjo situatë. Dhe jo vetëm takime, por natyrisht edhe gatishmëri që të gjendet zgjidhja e përbashkët.

Zëri i Amerikës: A po rrezikon vendi proceset politike përfshirë edhe bisedimet me Serbinë me krizën e brendshme politike?

Isa Mustafa: Po, unë mendoj se vendi është në një udhëkryq nga i cili duhet të dilet. Ka probleme. Shihet se institucionet nuk funksionojnë. Shihet edhe mënyra se si ato janë ndërtuar dhe si kanë përfunduar zgjedhjet nuk kanë dhënë rezultate që ofrojnë stabilitet të qeverisjes. Dhe ne këtë e kemi thënë sepse, vështirë është të krijohet një stabilitet i qeverisjes me një shumicë kaq të ngushtë në Kuvend dhe me insistimin që me këtë shumicë pastaj të bëhen të gjitha dhe të gjitha t’u takojnë partive që janë në pozitë pa konsultimin e opozitës. Por, unë mendoj që gjithmonë ka kohë dhe gjithmonë ka rrugë dhe ka mënyra që situata të tejkalohet.

Zëri i Amerikës: Dialogu me Serbinë do të ndërpritet nëse shkoni në zgjedhje?

Isa Mustafa: Por, natyrisht që do të ndërpritet, sepse ata që janë duke zhvilluar dialog nuk do të kenë mandat që ta zhvillojnë këtë më tutje. Edhe dialogu, sipas nesh, ka filluar i papërgatitur, ka filluar pa përkrahjen e gjerë të partive parlamentare në Kuvend. Ka filluar me një rezolutë të njëanshme, do të thotë të vetëm pozitës dhe rrezikon që edhe në qoftë se zhvillohet kështu, të mos ketë qëndrueshmëri të mjaftueshme dhe ne nuk do të dalim mirë para opinionit ndërkombëtarë, para miqve tanë ndërkombëtarë, në qoftë se nuk arrijmë që rezultatet e bisedave të jenë rezultate të qëndrueshme.

Të ngjashme

XS
SM
MD
LG