Lidhje

Polemika për fjalimin e Netanyahut në Kongres


Po shtohet numri i ligjvënësve demokratë që do të bojkotojnë fjalimin e Kryeministrit izraelit Benjamin Netanyahu muajin e ardhshëm para Kongresit amerikan. Kryetari i Dhomës së Përfaqësuesve John Boehner e ftoi udhëheqësin izraelit të flasë para ligjvënësve lidhur me negociatat për programin bërthamor të Iranit pa u konsultuar me Shtëpinë e Bardhë, ndërkohë që Kongresi po shqyrton një projekt-ligj për të vendosur sanksione të reja kundër Iranit. Administrata Obama e kundërshton projekt-ligjin me shqetësimin se mund të dëmtojë bisedimet. Polemikat mbi fjalimin e zotit Netanyahu kanë bërë bujë si në Uashington, ashtu edhe në Jeruzalem.
Kongresi e merr vetë këtë vendim. Nuk mendoj se po provokoj ndokënd,” u shpreh Kryetari i Dhomës së Përfaqësuesve John Boehner lidhur me vendimin për të mos respektuar protokollin, duke ftuar Kryeministrin izraelit Benjamin Netanyahu për të folur para Kongresit mbi negociatat me Iranin.

Njoftohet se Shtëpia e Bardhë ishte revoltuar që nuk iu mor mendim për këtë fjalim, pasi negociatat kanë hyrë në një fazë delikate.

Presidenti Obama tha se fjalimi krijon tension në marrëdhëniet SHBA-Izrael dhe nënvizoi shqetësimet se i detyron ligjvënësit demokratë të zgjedhin mes administratës Obama dhe Izraelit.

“Kjo marrëdhënie nuk i ka themelet tek lidhjet mes Partisë së Punës dhe Partisë Demokrate, apo Partisë Likud dhe asaj Republikane. Kjo është marrëdhënia SHBA-Izrael, që kapërcen kufijtë partiakë”.

Fjalimi i 7 marsit do të zhvillohet dy javë para zgjedhjeve në Izrael. Disa e konsiderojnë këtë fjalim si manovër politike që i jep zotit Netanyahu një forum për t’u treguar i ashpër ndaj Iranit në mënyrë që të fuqizojë fushatën elektorale. Nancy Pelosi është kryetarja e pakicës demokrate në Dhomën e Përfaqësuesve:

“Disa përkrahës të fortë të Izraelit më kanë kontaktuar dhe kanë shprehur revoltimin që platforma e Dhomës së Përfaqësuesve po shfrytëzohet në një mënyrë politike në Izrael dhe në Shtetet e Bashkuara”.

Por organizata konservatore të hebrenjve të Amerikës si dhe anëtarë konservatorë të Kongresit shprehen ndryshe. Elliott Abrams punon në Këshillin për Marrëdhënie me Jashtë:

“Ata janë objekti i kërcënimeve iraniane. Irani nuk ka kërcënuar të fshijë nga faqja e dheut Shtetet e Bashkuara. Pra, nëse i jepet mundësia të flasë para Kognresit, kur dihet se Kongresi do të duhet të marrë një vendim mbi këtë çështje, vështirë që kryeministri izraelit ta mohojë këtë shans”.

Fjalimi dëmton edhe më tej marrëdhëniet e tensionuara mes Presidentit Obama dhe Kryeministrit Netanyahu. Alan Eisner punon për organizatën liberale të hebrenjve të Amerikës J Street:

“Është vështirë për mua të them çfarë mendon Netanyahu, por i vetmi shpjegim i logjikshëm është se ia ka vënë vizën Shtëpisë së Bardhë dhe këtij presidenti dhe ka vendosur të luajë kartën e tij ndaj republikanëve në Kongres”.

“Gjërat kanë shkuar shumë keq. Është për të ardhur keq por mendoj se nuk duhet ta ekzagjerojmë situatën. Është problem mes zotit Obama dhe zotit Netanyahu dhe jo mes Izraelit dhe Shteteve të Bashkuara”.

Thirrjet që zoti Netanyahu të anulojë fjalimin e planifikuar po shtohen si në Shtetet e Bashkuara edhe në Izrael. Por ai është zotuar t’i përmbahet planit fillestar.

Trego komentet

XS
SM
MD
LG