Lidhje

Një film për parqet kombëtare të SHBA-së


Rreth 100 vjet më parë, disa nga peisazhet më të bukura dhe të virgjëra të Amerikës rrezikoheshin të shkatërroheshin prej fermerëve, sharrëxhinjve dhe ndërtuesve. Por, falë Presidentit Theodore Roosevelt, një natyralist i mirënjohur, këto peisazhe të çmuara u klasifikuan si parqe kombëtare që do të ruheshin dhe mbroheshin për brezat e ardhshëm. Në këtë 100-vjetor të parqeve kombëtare, një film i ri i xhiruar me teknologjinë mahnitëse IMAX 3D, eksploron historinë e parqeve dhe udhëheq shikuesit në një udhëtim skenik përmes pamjeve që të lënë pa frymë.

Këto peisazhe mahnitëse janë disa ndër mrekullitë e natyrës që gjenden në parqet kombëtare në mbarë Amerikën.

Ato janë bërë subjekt i një film të ri të titulluar “Një Aventurë në Parqet Kombëtare”.

Duke përdorur teknologjinë IMAX 3D, një ekip producentësh të njohur i mbartin shikuesit në një udhëtim mahnitës visual përmes pjesës më të madhe të 60 parqeve kombëtare të Amerikës.

Regjisori i filmit, Greg MacGillivray, thotë se pati synimin të përkujtonte 100-vjetorin e parqeve.

“Menduam të gjithë se do të ishte një ide e shkëlqyer të festonim 100-vjetorin duke vlerësuar parqet që ne dashurojmë në një film madhështor aventure.”

Filmi gjithashtu ua rikujton njerëzve që parqet ndodhen aty për t’i shijuar.

“Do të doja që audienca të përjetojë një nivel të lartë nderimi për parqet.”

Filmi shpjegon se si u krijuan parqet prej Presidentit Theodore Roosevelt dhe natyralistit John Muir, për të mbrojtur dhe ruajtur tokën, si dhe kafshët që jetojnë mbi të.

Historia shtjellohet nëpërmjet syve të tre aventurierëve të tanishëm, ndërsa ata u ngjiten maleve, u japin biçikletave, dhe eksplorojnë shtigjet përmes parqeve madhështore kombëtare.

Producenti Shaun MacGillivray e quan filmin “një rrugëtim”.

“Jemi në gjendje të paraqesim zona të jashtëzakonshme që nga Shkëmbi i Verdhë dhe deri tek Kanioni i Madh dhe ndërkohë i lidhim ato me personazhe individësh.”

Parqet rezultuan të jenë subjekti perfekt për formatin e teknologjisë IMAX 3D.

“Meqë audienca përjeton sikur ndodhet vërtet aty, filmi është në gjendje të përçojë pjesën më të bukur të parqeve.”

Roberd Redford, regjisor, drejtor filmash, dhe aktivist mjedisor, është ai që përshkruan gjatë filmit.

“Kur viziton një park, natyra ka shtrirje të madhe dhe të rrethon nga të tëra anët. Kështu që IMAX është teknologjia e duhur për të rikrijuar këtë eksperiencë për njerëzit që nuk kanë mundësinë të shkojnë fizikisht në park.”

“Një nga skenat që më pëlqen më shumë në film është kur shkojmë në Katmai, të Alaskës, dhe filmojmë arinjtë që peshkojnë. Të duket sikur je aty së bashku me ta.”

Ekipi u përball me kushte ekstreme të motit dhe me një terren të vështirë xhirimi për të fiksuar pamjet dhe tingujt e thesareve natyrore të Amerikës.

“Vendosja e kamerës për të xhiruar kacavirrjen ishte tepër e vështirë, ne veçanti tek ‘Kulla e Djallit’. Është një majë e thepisur dhe na u desh të vendosnim mbi të kamerën që do të xhironte alpinistët nga lart.”

“Pasi njerëzit të shikojnë filmin do të kuptojnë shtrirjen dhe diversitetin e sistemit të Parqeve Kombëtare në Shtetet e Bashkuara. Nëse largohen të frymëzuar, atëherë do t’ia kemi arritur qëllimit tonë.”

XS
SM
MD
LG