Presidenti nigerian Gudllak Xhonathan thotë se autoritetet do të ndjekin përgjegjësit për një sulm me bombë në Abuxha natën e Vitit të Ri, me ç’rast u vranë së paku katër vetë.
Ministri i mbrojtjes i Nigerisë thotë se një grua shtatzënë ishte në mesin e atyre që vdiqën kur ndodhi shpërthimi në një dyqan, ku njerëzit ishin mbledhur për të festuar Vitin e Ri. Ministri shton se 26 vetë të tjerë u lënduan.
Askush nuk ka marrë përgjegjësinë për sulmin.
Duke folur në një shërbesë kishtare për Vitin e Ri në Abuxha, Presidenti Xhonathan tha se sulmi i ngjante atyre që ishin kryer natën e Krishtlindjeve në qytetin Xhos, në pjesën qendrore të vendit.
Grupi i radikalëve islamikë “Boko Haram” mori përgjegjësinë për shpërthimet në Xhos dhe për sulmet e ndërmarra po atë natë ndaj kishave në qytetin Maiduguri.