Zyrtarë në Pakistan thonë se një sulm vetvrasës gjatë një funerali në veriperëndim të vendit, shkaktoi të paktën 37 të vrarë dhe 45 të plagosur.
Zyrtarët thanë se shpërthimi i sotëm kishte në shënjestër disa qindra njerëz që merrnin pjesë në ceremoninë e varrimit të gruas së një pjestari të milicisë anti-taleban afër qytetit të Peshavarit. Kjo zonë njihet për përleshjet e përgjakshme mes talebanëve dhe luftëtarëve pro-qeverinë.
Talebanët morën përgjegjësinë për sulmin.
Ky sulm vjen një ditë pas shpërthimit të një makine bombë, ku u vranë të paktën 24 njerëz dhe u plagosën 125 të tjerë. Një zëdhënës i militantëve tha se ata kishin në shënjestër agjencinë e zbulimit si hakmarrje për vrasjen e një komandanti talebanë në qytet. Edhe për këtë shpërthim e morrën përgjegjësinë talebanët.