Zyrtarët në Pakistan po marrin hapa për t’iu përgjigjur sulmit të djeshëm të talebanëve ndaj një shkolle në Peshawar, ndërsa vendi filloi tre ditë zie kombëtare për 132 fëmijët dhe 9 personat e tjerë që u vranë në këtë sulm.
Kryeministri Nawaz Sharif miratoi sot një urdhër për heqjen e moratoriumit për dënimin me vdekje për rastet e terrorit që ekzistojnë që nga viti 2008.
Zoti Sharif po ashtu u zotua ta vazhdojë ofensivën kundër militantëve në rajonin fisnor në veriperëndim të vendit, pranë kufirit afgan.
Talebanët e Pakistanit thanë se e kishin kryer sulmin dje si hakmarrje ndaj masave të ushtrisë për ndjekjen e kryengritësve.
Ndërkohë, gjenerali i ushtrisë pakistaneze Raheel Sharif dhe kreu i shërbimit të zbulimit, Rizwan Akhtar, shkuan sot në Kabul për t’u takuar me presidentin afgan Ashraf Ghani dhe me gjeneralin amerikan John Campbell, komandant i NATO-s në Afghanistan.
Korrespondenti i Zërit të Amerikës Ayaz Gyl thotë se kjo është një vizitë e paprecedent dhe mund të sinjalizojë një çarje në marrëdhëniet e përmirësuara mes Pakistanit dhe Afghanistanit.