Në pjesën veriperëndimore të Pakistan rreshjet vazhduan edhe sot, ndërkohë që përmbytjet më të rënda për sa kohë që mbahet mënd kanë shkaktuar vdekjen e të paktën 1 mijë e 400 vetëve.
Operacionet e ndihmave janë penguar nga rrugët e përmbytura si dhe nga dëmtimi i urave dhe shërbimeve të domosdoshme.
Kombet e Bashkuara thanë se këto përmbytje kanë prekur më shumë se 3 milion njerëz.
Disa të mbijetuar janë ankuar lidhur me përgjigjen e qeverisë ndaj kësaj katastrofe.
Fondi i OKB-së për Fëmijët, UNICEF, tha se ekziston nevoja kritike për ushqime dhe ujë të pijshëm, ndërkohë që mundësia e shpërthimit të sëmundjeve përbën një shqetësim të madh.
Një zëdhënës i Kryqit të Kuq në Washington i tha Zërit të Amerikës se ndotja e ujit të pijshëm përbën një rrezik të madh në zonat e prekura. Ai tha se organizata po diskuton me qeverinë pakistaneze mundësinë që punonjësit e ndihmave të mund të shkojnë më me lehtësi në zonat e prekura më rëndë.