Diskutimi në parlament i programit qeveritar

Në Shqipëri parlamenti nisi sot një seancë maratonë ku po debatohet rreth programit të qeverisë së re të kryeministrit Edi Rama. Ndërsa përfaqësuesit e shumicës po këmbëngulin se janë të angazhuar për mbajtjen e premtimeve të bëra, opozita e djathtë e ka sulmuar atë se ka paraqitur një program elektoral, në të cilin nuk ka afate dhe nuk tregohet, sipas tyre, se si do të përmbushen objektivat që ajo ka shpallur. Seanca pritet të vazhdojë gjatë dhe debatet parashikohet se do të mund të përmbyllen para ditës së nesërme, për t’i hapur keshtu rrugë votbesimit të qeverisë.