Lidhje

Përmbytet strehimorja e refugjatëve në Janinë

  • Raimond Kola

Përmbytjet e 24 orëve të fundit kanë nxjerrë jashtë funksionit një strehimore refugjatësh sirianë në zonën e Kacikas afër Janinës.

Mjetete greke të informimit njoftuan se për t'i shpëtuar përmbytjes dhjetëra grupe refugjatësh u zhvendosën vullnetarisht në zona të ndryshme të qytetit dhe po kërkojnë mbështetje nga autoritetet. Organizatat kanë kërkuar ndihmën e Komisionerit për Refugjatët në Kombet e Bashkuara për një zgjidhje të shpejtë sidomos për rreth 100 fëmijë dhe gra që kanë mbetur në qiell të hapur.

Autoritete greke premtuan pak ditë më parë restaurimin e një qendre tjetër kur në këtë kamp u shtuan tensionet. Qendra do të mundësonte transferimin brenda dhjetë ditësh të një pjese të refugjatëve, por përmbytjet masive e kanë bërë situatën emergjente.

Qyteti verior grek ndodhet rreth 60 kilometra nga kufiri shqiptar dhe grupet e refugjatëve rrezikojnë të udhëtojnë drejt Shqipërisë duke rënë pre e trafikantëve. Shqipëria përballon aktualisht prurje në grupe të vogla të refugjatëve kryesisht nga Siria, Pakistani dhe Afganistani. Por përkeqësimi i motit në rajon mund të rrisë depërtimin e tyre, pasi rojet shqiptare të kufirit dyshojnë se trafikantët i mbajnë me ditë të tëra fshehur në zonat pyjore afër kufirit grupet e refugjatëve.

Agjencia e Kombeve të Bashkuara për Refugjatët, UNCHR hapi pak kohë më parë një zyrë në Gjirokastër dhe synon ndihmën për grupet e refugjatëve që depërtojnë në territorin shqiptar. Refugjatët e përdorin Shqipërinë si një pikë të përkohshme në udhëtimin drejt Malit të Zi apo Kosovës, me destinacion final vendet perëndimore si Italinë, Gjermaninë dhe Britaninë.

Trego komentet

XS
SM
MD
LG