Policia norvegjeze njoftoi se ka konfiskuar pajisje të ndryshme elektronike në ishullin Utoeya, si pjesë e hetimeve lidhur me vrasjen masive të 77 personave më 22 korrik.
Një avokat i policisë tha në Oslo se hetimet rreth sulmit në ishull dhe një shpërthimi në kryeqytetin e vendit ende vazhdojnë dhe se policia ka marrë si dëshmi nga ishulli telefona celularë dhe pajisje të tjera.
Ai nuk pranoi të prononcohej kur u pyet nëse policia mendonte se personi i cili i ka pranuar vetë sulmet, Anders Breivik, ishte me probleme mendore.
Ndërkohë, sipas një gazete, 66 për qind e norvegjezëve kërkojnë dënime më të ashëpra pas vrasjeve që tronditën vendin.
Në një anketë të kryer gjashtë ditë pas sulmit, 65,5 përqind e norvegjezëve thanë se ndëshkimet janë "tepër të buta" dhe vetëm 23,8 për qind mendojnë se ato janë të mjaftueshme.