Të premten në mesnatë përfundon fushata dhjetëditëshe për zgjedhjet e parakohshme të së dielës në Kosovë. Partitë politike po mbajnë tubimet përmbyllëse në pjesë të ndryshme të vendit duke u zotuar për rritje të shpejtë ekonomike dhe krijim të qindra mijëra vendeve të punës gjatë katër viteve të ardhshme. Por, ekspertët e ekonomisë thonë se është e pabesueshme që në një periudhë të shkurtër të realizohen synime të tilla që nuk janë përmbushur për mbi 14 vjet me radhë, që nga zgjedhjet e para të pasluftës në Kosovë.
