Presidenti po i del në mbrojtje kompromisit që arriti me republikanët e opozitës për zgjatjen e afatit të shkurtimit të taksave për dy vjet. Por shumë demokratë të partisë së tij janë kundër planit. Ligjvënës demokratë në Dhomën e Përfaqësuesve po e kritikojnë kompromisin e arritur me republikanët, që lejon zgjatjen e afatit të shkurtimit të taskave për amerikanët e pasur.
Presidenti Obama u dërgoi një mesazh në video përkrahësve të tij, ku premton se lufta mbi shkurtimin e taksave për amerikanët e pasur nuk ka mbaruar – ajo vetëm se është shtyrë.
"E di që disa, bile disa miq të mirë janë të pakënaqur me planin pasi si me çdo negociatë kërkohet të japësh dhe të marrësh,"- tha Presidenti.
Por siç tha në konferencën e shtypit dje – me kohën që po afronte për ngritjen e taksave për amerikanët, ai kuptoi se kishte pak mundësi.
"Shkurtimet e taksave për klasën e mesme po mbaheshin peng ndaj shkurtimeve për të pasurit,"- tha ai.
Disa anëtarë të Partisë Demokrate të zotit Obama e kritikuan kompromisin
"Marrëveshja nuk ka përfunduar. Ta kemi të qartë. Nuk jam mbështetës i asaj çfarë është negociuar."
Senatori i pavarur Bernie Sanders nga Vermonti tha se do të mundohet ta bllokojë miratimin e projektligjit.
"Do të bëj ç’të mundem për ta kundërshtuar ligjin pasi mendoj se është një skandal moral,"- tha ai.
Republikani i njohur në senat Mitch McConnell e cilësoi marrëveshjen si një plan dypartiak për të ndaluar rritjen e taksave për çdo amerikan dhe për të krijuar nisma për rritje ekonomike.
Republikanët kishin kërcënuar të bllokonin punën në senat pa marrë siguri se niveli i tanishëm i taksave për 2 përqindëshin më të pasur të amerikanëve do të zgjatej.