Lidhje

Presidenti Topi uron Zërin e Amerikës me rastin e 70 vjetorit


Kam kënaqësinë e veçantë që të shpreh urimet më të mira, për të uruar Zërin e Amerikës për 70 vjetorin e krijimit. Zëri i Amerikës është një zë shumë i dashur për shqiptarët, zë me të cilin shqiptarët janë mësuar qysh në kohën kur e ndjenin mëse të nevojshëm për të marrë pak shpresë për të dalë nga izolimi i thellë komunist i atyre viteve të paharruara për keq.

Natyrisht Zëri i Amerikës është zëri i një vendi të madh, zëri i Shteteve të Bashkuara të Amerikës, aleatit më të madh historik të shqiptarëve, një zë i vërtetë, një zë me të cilin shqiptarët janë mësuar për të çertifikuar të vërtetën që ndodh kudo në botë.

Çdo njeri sigurisht ka emocionet e veta për t’iu kthyer kujtesës në retrospective. Kam qenë i vogël kur kam dëgjuar Zërin e Amerikës së bashku me babain tim. E dëgjonim me zë të ulët për të mos na dëgjuar informatorët e Sigurimit.

Ndërsa sot Zëri i Amerikës jo vetëm që dëgjohet hapur në një vend të lirë e demokratik sikurse është Shqipëria, por edhe si president i Republikës, kam patur rastin të komunikoj shumë hapur me redaksinë shqiptare të Zërit të Amerikës, të komunikoj hapur nga studiot e Zërit të Amerikës, dhe patjetër të çoj ato mesazhe që janë shumë të vyera për popullin shqiptar.

Zëri i Amerikës është institucioni mediatik do të thoja më prestigjoz në nivel global, dhe në këtë 70 vjetor jo vetëm e uroj, por edhe e falenderoj në emër të të gjithë qytetarëve shqiptarë për shërbimin e vyer që i ka bërë demokracisë shqiptare, për shërbimin e vyer që i bën integrimit të Shqipërisë në atë aspiratë të madhe të popullit shqiptar për të qenë jo vetëm në NATO por edhe në Bashkimin Evropian.

Urimet më të mira!

XS
SM
MD
LG