Lidhje

Protestë për të drejtat e shqiptarëve të Preshevës


Një organizatë e shqiptarëve të Luginës së Preshevës në Shtetet e Bashkuara po mban në Nju Jork një tubim përpara ndërtesës së Kombeve të Bashkuara, për t’i kërkuar qeverisë së Beogradit që t’i jape fund asaj që organizata e quan shtypje dhe diskriminim të shqiptarëve në Serbinë jugore.

Në një deklaratë, organizata thotë se shqiptaro-amerikanët janë thellësisht të shqetësuar për keqësimin e gjendjes së të drejtave të njeriut dhe rritjen e tensioneve në Luginën e Preshevës.

Organizata i referohet heqjes nga qendra e Preshevës të një përmendoreje të ngritur në përkujtim të veteranëve të Ushtrisë Çlirimtare të Preshevës, Medvegjës dhe Bujanocit. Në deklaratë thuhet se qeveria e Serbisë përdori forcën duke e hequr përmendoren, në vend që të ndërtonte ura me komunitetin shqiptar të Luginës.

Sjellja e qeverisë serbe, thuhet në deklaratë, nuk ka vend në Evropë, sidomos tani që Serbia pret datën për fillimin e bisedimeve të anëtarësimit në Bashkimin Evropian. Protestuesit bëjnë thirrje në deklaratën e tyre që shqiptarëve të Preshevës t’u garantohen të drejta të njëjta me ato që gëzon pakica serbe në veri të Kosovës dhe që përmendorja të kthehet aty ku ishte vendosur.

Trego komentet

XS
SM
MD
LG