Një aleancë ndërkombëtare shëndetësore që punon për të zhvilluar një vaksinë kundër malaries thotë se një prej vaksinave të saj më të përparuara, e quajtur RTSS, po tregon rezultate premtuese. Pas dy vjet provash klinike në Afrikë, Nisma Vaksina kundër Malaries dhe bashkëpunëtorët e saj shpallën se vaksina e re ofron mbrojtje kundër malaries për fëmijët e moshës pesë muajsh deri në 17 muajsh.
Shkencëtarët që po punojnë për vaksinën e parë në botë kundër malaries e quajnë vaksinën e re provë së hap të rëndësishëm historik.
"Për 40 vjet shkencëtarët janë duke u përpjekur për të zhvilluar vaksinën kundër malaries dhe më në fund ky është rezultati."
Dr. Christian Loucq është drejtor i Nismës së Vaksinës kundër Malaries - një grup ndërkombëtare jo-fitimprurëse i përfshirë në vlerësimin e sigurisë dhe efikasitetit të vaksinës së re. Mijëra fëmijë në shtatë vende në Afrikë kanë marrë vaksinën e re. Ekspertët zbuluan se tek fëmijët e vaksinuar, rreziku malaries është përgjysmuar.
Dr. Daniel Ansong është pediatër që shqyrtoi provat e vaksinës në një klinikë në Gana:
"Faza e tretë e provave do të tregoj efikasitetin dhe sigurinë e vaksinës. Rezultatet janë të qarta dhe të qëndrueshme. Ne jemi shumë të lumtur dhe të inkurajuar për të shkuar përpara."
Dr. Ansong beson se vaksina do të jetë një armë e re e vlefshme në luftën globale kundër malaries.
Kritikët thonë se në provat në terren, vaksina e re ishte vetëm 47 për qind efikase kundër rasteve të rënda të malarjes, një nivel mbrojtjës, thonë ata, që duhet të jetë më i lartë. Por, mjekët pediatër thonë se malaria shkakton 800.000 vdekje të fëmijëve çdo vit, edhe niveli i tanishëm mbrojtës që ofron vaksina e re mund të shpëtojë mijëra jetë njerëzish.
Dr Joe Cohen është bashkë-shpikës i vaksinës RTS S dhe ekspert barnash pranë firmës farmaceutike GlaxoSmith-Kline. Kjo kompani ka investuar 300 milionë dollarë për zhvillimin e vaksinave kundër malaries.
Dr Cohen thotë se puna për zhvillimin e një vaksinë kundër malaries ka qenë një sfidë e madhe shkencore.
"Problemi, është parazit në vetvete. Paraziti Malaria - parazitët në përgjithësi - janë organizma shumë komplekse, me ADN të ndërlikuar me mijëra gjene, krejt ndryshe nga bakteret apo viruset ".
Firma GlaxoSmith-Kline thotë se ka në plan të investojë një shtesë deri 100 milionë dollarë në programin e vaksinës. Shkencëtarët thonë se do të fillojnë provën e vaksinës në shkallë të gjërë pas përfundimit të suksesshëm të fazës së tanishme ku përfshihen 3 prova.
Zhvilluesit e vaksinës kanë në plan t'i paraqesin rezultatet përfundimtare të provave të vaksinës pranë Organizatës Botërore të Shëndetësisë në vitin 2014. Shpresa e tyre është se OBSH-ja do të rekomandojë që vaksina të bëhet një pjesë rutinë e vaksinimit të fëmijëshme për parandalimin e malaries në të ardhmen.