Tashmë kanë kaluar 16 vjet nga miratimi i Kushtetutës së Shqipërisë, pohuan studiuesit, dhe kanë ndodhur shumë ngjarje politike, juridike e sociale, që e kanë vënë në provë ligjin themelor të shtetit, duke zbuluar edhe shumë boshllëqe ligjore. Zgjedhja e anëtarëve të Gjykatës Kushtetuese, të Gjykatës së Lartë, zgjedhja e Avokatit të Popullit, përplasjet e vazhdueshme të parlamentit me prokurorët e përgjithshëm dhe paaftësia e parlamentit për të kontrolluar qeverinë janë disa nga difektet kryesore, që duhen korrigjuar, sipas ekspertëve.
Difektet jo të vogla, pohuan ekspertët, kanë dobësuar institucionet e pavarura përballë presioneve të shumicës politike në parlament dhe në qeveri. Sipas tyre, një nga sfidat kryesore të reformës kushtetuese mbetet edhe praëpësimi i ndryshimeve kushtetuese të vitit 2008, të cilat sollën efekte të pamenduara në formulën e zgjedhjes së presidentit dhe në mekanizmin e votëbesimit të qeverisë.
Studiuesit pohuan se anëtarësimi në Bashkimin Europian e bën të domosdoshëm rishikimin e Kushtetutës, sepse sapo Shqipëria të marrë statusin e vendit kandidat, rendi i saj juridik bëhet automatikisht i njëjtë me atë të BE-së. Megjithatë sfidë kryesore mbetet edhe mirëkuptimi shumëpartiak për t'i kryer ndryshimet kushtetuese. Transparenca dhe gjithëpërfshirja janë thelbi i reformës kushtetuese, e cila duhet të nxitë një pjesëmarrje sa më të gjerë qytetare dhe profesionale.
Kushtetuta e Shqipërisë u miratua me referendum pa miratimin e opozitës në nëntor 1998, në kulmin e tensionit politik që solli vrasja me armë zjarri e deputetit Azem Hajdari në oborrin e selisë së Partisë Demokratike. Kushtetutës iu bënë ndryshime në vitin 2007 dhe në vitin 2008, për të cilat pati kundërshtime të mëdha nga partitë e mëdha dhe sidomos nga ato të vogla. Për ndryshimet në Kushtetutë asnjëherë nuk ka patur bisedime të qeta teknike dhe as vullnet gjithëpërfshirës.