Zyrtarët në Nigeri thonë se një bombë ka shpërthyer në një shitore brenda një kazerme ushtarake në kryeqytetin Abuxha.
Televizioni nigerian njofton se së paku 30 vetë u vranë nga shpërthimi. Policia nuk ka konfirmuar shifrën.
Zyrtarët thonë se bomba shpërtheu brenda dyqanit “Mammy”, ku njerëzit po hanin e po pinin për të kremtuar natën e Vitit të Ri.
Askush nuk ka marrë përgjegjësi për sulmin.
Presidenti nigerian Gudllak Xhonathan fajësoi për bombardimin grupin e radikalëve islamistë “Boko Haram”.
Grupi mori përgjegjësinë për sulmet me bombë natën e Krishtlindjeve në qytetin Xhos në qendër të vendit dhe për sulmet ndaj disa kishave në qytetin verior Maiduguri. Më shumë se 80 vetë vdiqën në ato sulme.
Abuxha u trondit nga sulmet me autobombë në muajin tetor. Përgjegjësinë e morën militantët nga rajoni jugor i Deltës së Nigerit, që njihet për prodhimin e naftës.