Sekretari amerikan i Mbrojtjes Robert Gejts po e përqëndron vemendjen gjatë turneut në 3 vende të Azisë te kërcënimi nga tensionet në Gadishullin Korean dhe programi bërthamor i Koresë së Veriut.
Sekretari Gejts mbërriti sot në Tokio për bisedime me kryeministrin japonez Naoto Kan, si dhe me ministrin e mbrojtjes dhe atë të jashtëm të Japonisë. Të premten ai shkon në Seul, ku i jep fund turneut në Azi. Para se u largua nga Kina, Sekretari Mbrojtjes tha se si udhëheqësit civilë edhe ata ushtarakë janë gati t’i vazhdojnë edhe më tej marrëdhëniet amerikano-kineze.
Gjatë ditës së sotme, Sekretari Gejts bëri një turne në qendrën e komandës bërthamore të vendit si dhe vizitoi Murin e Madh në veri të Pekinit, para se të nisej për në Japoni.
Zoti Gejts tha se mbeti i kënaqur nga bisedat e sinqerta me komandantët në selinë bërthamore, përfshirë edhe një diskutim rreth strategjisë bërthamore të Kinës.
“Diskutuam rreth strategjisë bërthamore dhe qëndrimin e Kinës në rast konflikti. Folëm rreth politikës kineze për të mos përdorur e para forcën, rreth komandës e kontrollit dhe rreth një sërë çëshjesh të tjera. Mendoj se patëm një diskutim të hapur, që e përqëndruam në një game të gjerë çështjesh”.
Ai tha se komandanti i kësaj qendre në periferi të Pekinit pranoi ftesën për të vizituar selinë e komandës strategjike të Shteteve të Bashkuara në shtetin e Nebraskës.
Sekretari i Mbrojtjes Gejts tha se ishte i kënaqur me rezultatet e vizitës, e cila kishte për qëllim rivendosjen e kontakteve të drejtpërdrejta mes ushtrive të të dy vendeve me objektivin për të shmangur keqkuptimin.
“Mendoj se diskutimet ishin shumë produktive dhe krijuan kushtet për t’i vazhduar e përmirësuar marrëdhëniet mes dy ushtrive".
E papritura më e madhe e vizitës ishte vendimi i Kinës për të kryer fluturimin e parë provë të avionit ushtarak në të njëjtën ditë që Sekretari Gejts u takua me presidentin Hu Jintao.
Gjatë bisedimeve të djeshme me presidentin Hu, zoti Gejts i kërkoi Kinës ndihmë që Koreja e Veriut të braktisë programet e saj bërthamore dhe të raketa ndërkontinentale.