Lidhje

Shkencëtarët vazhdojnë kërkimet për trajtim më të mirë të Sklerozës së Shumëfishtë

  • Kristofor Cruz

Shkencëtarët vazhdojnë kërkimet për trajtim më të mirë të Sklerozës së Shumëfishtë

Shkencëtarët vazhdojnë kërkimet për trajtim më të mirë të Sklerozës së Shumëfishtë

Administrata amerikane për Ushqimin dhe Ilaçet thotë se skleroza e shumëfishtë prek gati 400 mijë njerëz në Shtetet e Bashkuara. Më shumë se dy milionë të tjerë besohet se jetojnë me këtë sëmundje në botë e cila njihet ndryshe si MS.

Ka katër lloje të sklerozës së shumëfishtë. Më i përhapuri është Rikthimi me Ndërprerje. Gati 85 përqind e pacientëve fillojnë të preken nga kjo lloj skleroze. Këta pacientë kanë një ose dy probleme shëndetësore madhore që lidhen me sëmundjen çdo një deri në tre vjet. Pastaj ata kanë periudha që nuk kanë shenja të sëmundjes.

Problemet shfaqen papritur dhe zgjasin disa javë apo muaj para se të zhduken ngadalë. Ato mund të përfshijnë mungesën e ekuilibrit, rënie të energjisë, vështirësi për të folur qartë dhe deri tek humbja e shikimit. Mjekimet me steroide mund të shpejtojnë mëkëmbjen nga këto probleme. Megjithatë këto simptoma mund të keqësohen sa herë që shfaqen.

Zëri i Amerikës bisedoi me 35 vjeçaren, Amy Jo Rowell. Mjekët zbuluan katër vjet më parë se ajo kishte sklerozë të shumëfishtë. Amy thotë se gjendja e saj nuk po përmirësohet, por as po keqësohet.

“Po përshtatem. Ndonjëherë simptomat përkeqësohen në një pjesë të trupit apo një tjetër. Pas një periudhe filloj të stabilizohem, ndonjëherë me dëmtime të përhershme – si humbja e ndjeshmërisë dhe mungesa e koordinimit. Ndonjëherë më ndikon tek e folura. Por kam qënë me fat në pjesën më të madhe. Nuk jam kuruar pasi për këtë sëmundje nuk ka shërim por jam stabilizuar. Sëmundja ka të përpjeta e të tatëpjeta dhe tani jam në një gjendje të qëndrueshme”.

Shkencëtarët thonë se sëmundja nuk kalon direkt nga prindërit tek fëmijët. Megjithatë është vërejtur se ajo prek anëtarë të së njëjtës familje. Shoqata Kombëtare për Sklerozën e Shumëfishtë thotë se një në çdo 750 amerikanë është në rrezik të preket nga një formë e kësaj sëmundjeje. Por rreziku shtohet në një në çdo 40 persona mes atyre që kanë një anëtar të familjes të sëmurë me sklerozën e shumëfishtë.

Shkaktar për problemin nuk duket se është një gjen i vetëm. Në fakt shumë gjene mund të rrisin mundësinë që një person të preket nga skleroza e shumëfishtë. Për këtë sëmundje nuk ka shërim. Por ajo jo gjithmonë shkakton dëmtime të mëdha. Shumë njerëz me sklerozë të shumëfishtë janë në gjendje të bëjnë një jetë normale. Përshembull Amy Jo Rowell vazhdon të operojë një strehë për kafshët në shtetin e Wisconsinit.

Instituti Kombëtar për Sëmundjet Neurologjike thotë se disa njerëz mund të jetojnë me këtë sëmundje pa asnjë lloj mjekimi. Instituti paralajmëron gjithashtu se shumë ilaçe megjithatë kanë efekte anësore dhe paraqesin rrezik për shëndetin. Kërkimet kanë çuar në përfundimin se mënyra më e mirë për të pakësuar efektet e sëmundjes në të ardhmen është fillimi i terapisë sa më shpejt. Ekspertët mjekësorë thonë se trajtimi parandalues është mbrojtja më e mirë ndaj dëmtimeve të përhershme të sistemit nervor.

Vitin e kaluar Administrata për Ushqimin dhe Ilaçet miratoi dalfampridinën për të ndihmuar pacientët me vështirësi në ecje nga skleroza e shumëfishtë. Dalfampridina shitet me emrin Ampyra. Zyrtarët thonë se ilaçi ka efekte anësore dhe mund të shkaktojë spazëm nëse merret në doza të larta.

Timothy Coetzee është shkencëtar pranë Shoqatës Kombëtare të Sklerozës së Shumëfishtë. Ai i tha Zërit të Amerikës se zhvillimet e viteve të fundit lënë të kuptohet se studiuesit janë pranë gjetjes së shkakut të sëmundjes.

“Me arritjet e teknologjisë dhe gjenetikës dhe mundësinë për të mbledhur informacioneve nga mijëra njerëz, mendoj se do të shohim studime të reja që do të na ndihmojnë të identifikojmë shkakun e kësaj sëmundje”.

Edhe pse ende pa kurim për sëmundjen, shkencëtarët po e kuptojmë më mirë atë. Ky fakt po çon në mjekime më të mira që mundësojnë një jetë më cilësore për pacientët.

Shoqata Kombëtare e Sklerozës së Shumëfishtë vazhdon të mbështesë kërkimet. Grupi ka krijuar një faqe elektronike që tregon për përparimin e bërë në lufën kundës sëmundjes. Aty ka gjithashtu informacione rreth ndihmës për njerëzit me këtë sëmundje, familjet e tyre dhe mjekët.

XS
SM
MD
LG