Lidhje

Vrasja në Shkodër e komandantit të FNSH-së

  • Pëllumb Sulo

Pas një rrethimi policor që zgjati mbi 12 orë, forcat speciale të policisë “RENEA” asgjësuan në mëngjesin e sotëm autorin e vrasjes të komandantit të njësisë së Forcave Policore të Ndërhyrjes së Shpejtë në Shkodër, nënkomisar Simon Gjeta.

Gjatë gjithë natës, forcat “RENEA” mbajtën nën rrethim autorin e krimit, i cili është 56-vjeçari Ruzhdi Aishta, banor i fshatit Obot i Ri, që ndodhen 7 kilometra afër qytetit të Shkodrës. Megjithë thirrjet e përsëritura të policisë për t’u dorëzuar, në mënyrë të vazhdueshme ai qëlloi në drejtim të forcave speciale “RENEA”, që kishin rrethuar banesën ku po strehohej autori i krimit.

Në orën 07 e 10 minuta të mëngjesit të sotëm, në kushtet e ndriçimit të plotë, forcat speciale “RENEA” hynë në banesë, ku u ndeshën me breshërinë e armës së autorit të krimit, i cili mbeti i vrarë gjatë shkëmbimit të zjarrit me policinë. Për shkak të rezikshmërisë së lartë të autorit të krimit, në operacionin për neutralizimin e tij morën pjesë edhe drejtuesit më të lartë të policisë së shtetit si dhe u angazhuan 250 forca policore dhe 15 automjete, ndër to 5 autoblinda.

Ngjarja e mbrëmshme nisi rreth orës 18 e 40 minuta, kur forcat e Komisariatit të Policisë së Shkodër dhe ato të Ndërhyrjes së Shpejtë shkuan në fshatin Obot i Ri për ndalimin e shtetasit Ruzhdi Aishta, i cili gjatë një konflikti të rastit, kishte plagosur me armë zjarri një bashkëfshatarin e tij 21-vjeçar.

Në momentet e ndërhyrjes në banesë, autori i krimit ka hapur zjarr ndaj forcave të policisë, ku për pasojë, gjeti vdekjen e menjëhershme Komandanti i FNSH, nënkomisar Simon Gjeta, vjeç 49, banues në Tiranë.

Vrasja e oficerit të policisë Simon Gjeta u dënua sot nga autoritetet më të larta të vendit, të cilët i shprehën ngushëllime familjarëve si dhe inkurajuan policinë në luftën kundër krimit. Në mesazhin dërguar familjarëve të komandantit të vrarë, Presidenti i Republikës Bujar Nishani shprehet se dënon ashpërsisht aktin gjakatar dhe u bën thirrje Policisë së Shtetit dhe organeve ligjzbatuese që të punojnë pareshtur, pavarësisht nga ngjarja e rëndë dhe tronditëse, në luftën e tyre të përditshme kundër krimit.

Ndërsa Kryeministri Edi Rama shprehet në mesazhin e tij për angazhimin e palëkundshëm për t'i shkuar deri në fund përpjekjeve shtetndërtuese, në radhë të parë për sundimin e ligjit në Shqipëri. Sipas Kryeministrit Rama “arritjet e Policisë së Shtetit në luftën pa asnjë tolerancë të shtetit me krimin, janë vepër e shqiptarëve të mirë si Simon Gjeta”.

Gjithashtu, mesazhe ngushëllimi dhe inkurajimi për familjarët e Komandantit Simon Gjeta dhe forcat e policisë përcollën edhe Kryetari i Parlamentit Ilir Meta si dhe Kryetari i Partisë Demokratike në opozitë Lulzim Basha.

Ndërkohë, është parashikuar që homazhet në nderim të komandantit të FNSH Shkodër, Simon Gjeta, të zhvillohen gjatë ditës së nesërme në kryeqytet.

XS
SM
MD
LG