Të paktën 80 persona janë vrarë në dy shpërthime vetëvrasëse në veriperëndim të Pakistanit. Përgjegjësinë e mori grupi taleban i Pakistanit, duke i quajtur sulmet hakmarrje ndaj vrasjes së Osama bin Ladenit.
Sulmet u kryen ndaj një qendre stërvitore ushtarake në provincën Kiber Paktun Kua. Zyrtarët thanë se shumica e të vrarëve ishin kadetë të rinj. Më shumë se 120 persona u plagosën, shumë prej të cilëve janë në gjendje të rëndë.
Dëshmitarët thanë se sulmet ndodhën ndërsa dhjetra kadetë të rinj po hipnin në makina për të shkuar në shtëpi. Një zëdhënës i talebanëve në Pakistan premtoi sulme të tjera hakmarrëse për vdekjen e bin Ladenit. Udhëheqësit pakistanezë dhe ambasada amerikane në Islamabad e dënuan sulmin.