Avokati i Popullit është gati të shpallë nisjen e procesit të vettingut, sipas ligjit, që synon një pastrim të plotë të sistemit të drejtësisë nga personat, që kanë abuzuar me postin.
Pasi këtë procedurë nuk mundi ta kryente Presidenti i Republikës për shkak të afateve kushtetuese të tejkaluara, atëherë është Avokati i Popullit zyrtari, që do të shpallë dhe zbatojë përzgjedhjen e kandidatëve për komisionet e vettingut në fazën e parë.
Hapi i parë i kësaj procedure, që nis së shpejti, është kërkesa publike për të sjellë kandidatura për të ngritur organet kryesore, që do të kryejnë vettingun.
Me kandidaturat hartohen dy lista; njëra me emrat që plotësojnë kriteret dhe tjetra me ata që nuk i plotësojnë sa duhet ato, dhe të dyja shqyrtohen nga Operacioni Ndërkombëtar i Monitorimit.
Pas sugjerimeve të tyre, Avokati i Popullit ia dërgon parlamentit kandidaturat për votim.
Prej disa kohësh një grup pune është ngritur pranë institucionit të Avokatit të Popullit, i cili po punon me transparencë për të nisur zbatimin e ligjit të Vettingut dhe të ligjit për qeverisjen e gjyqësorit, ku përfshihen ngritja dhe funksionimi i këshillit të lartë të gjyqësorit (KLGJ), këshillit të lartë të prokurorisë (KLP) dhe këshillit të emërimeve në drejtësi (KED).
Kjo shpallje shënon nisjen e zbatimit të një reforme të thellë, me rindërtim institucionesh dhe me përzgjedhje të njerëzve më të pastër e më me integritet në sistemin gjyqësor.
Zyrtarët dhe ekspertët besojnë se celësi i suksesit të kësaj reforme në drejtësi do të jetë bashkëpunimi mes institucioneve për të zgjedhur profesionistë të pavarur nga politika, dhe mospërfshirja e personave dhe ndikimeve politike.
Sipas zotit Totozani, nisja e këtij procesi është një mundësi e mirë për t'u përfshirë në sistemin gjyqësor shqiptar edhe të shumë djem e vajzave të reja, që studjojnë për drejtësi jashtë Shqipërisë, të cilët mund të punësohen në vendet e lira, që do të sjellë vettingu, në përputhje me kriteret ligjore.