Vlora është një nga zonat që, vlerësohet nga ekspertët, se po e godet papunësinë më mirë nga qytetet e tjera. Megjithë vështirësitë e krizës ekonomike, ndërmjetësimet për të punësuar të rinjtë dhe shkollimi i tyre profesional është rritur. Drejtuesja e shërbimit të punësimit në Vlorë, Marjana Cani, thotë se numri i punëkërkuesve është rritur pas hapjes së zyrave të punës, e cila ka ngjallur shpresat dhe ka tërhequr vëmendjen e të gjithë opinionit. Sipas saj, mosveprimi shumëvjeçar i zyrave të punës solli dekurajimin e të papunëve dhe shumë prej tyre as nuk deklaronin statusin e tyre dhe punonin në të zezë.
Punësimi në të zezë dhe informaliteti në Vlorë është ende shumë i lartë. Shërbimi i punësimit dhe inspektoriati i punës bashkëpunojnë për të zbardhur punën në të zezë. Gjatë ndërmjetësimit për punë të reja bizneset deklarojnë tani më shumë punëtorë me sigurime dhe dokumenta të rregullta. Zyra e punës në Vlorë është e angazhuar për të rritur punësimin, duke ndërmjetësuar me bizneset dhe duke përfshirë sa më shumë njerëz në programet e nxitjes së punësimit.