Ushtria amerikane tha të enjten se ka goditur tri vendndodhje radarësh në Jemen, si kundërpërgjigje ndaj sulmit me raketa nga territoret e kontrolluara nga kryengritësit houthi, që kishin vënë nën shënjestër një luftanije amerikane.
Zëdhënësi i Pentagonit, Peter Cook, i përshkroi goditjet si "vetëmbrojtje" të personelit dhe anijeve amerikane.
"Shtetet e Bashkuara do të përgjigjen ndaj çdo kërcënimi të mëtejshëm ndaj anijeve tona dhe trafikut tregtar, sipas nevojës dhe do të vazhdojë të mbrojë lirinë e lundrimit në Detin e Kuq, në Bab el-Mandeb, dhe kudo nëpër botë", tha ai.
Autoritetet thanë të mërkurën se një raketë është hedhur në Detin e Kuq duke vënë nën shënjestër luftanijen USS Mason, por dështoi ta godas atë, i tha Zërit të Amerikës një zyrtar që nuk deshi të identifikohej.
Raketa, e dyta gjatë katër ditëve, ishte hedhur nga zonat e kontrolluara nga houthit në jug të Al Hudaydah.
Kryengritësit houthi në Jemen, mohuan çdo përfshirje në sulmin kundër luftanijes Mason.
Të mërkurën ishte përvjetori i 16-të i sulmit terrorist në Jemen që vrau 17 marinarë amerikanë në luftanijen USS Cole në portin e Adenit. Al-Qaida mori përgjegjësinë për sulmin e vitit 2000 dhe gjykatat amerikane e mbajtën përgjegjëse qeverinë e Sudanit. Mbi 13 milionë dollarë të pasurive të ngrira sudaneze u shpërndanë për të kompensuar të afërmit e viktimave.