Në Shqipëri autoritetet më të larta shtetërore dhe politike të vendit përshëndetën vendimin e marrë nga Gjykata Ndërkombëtare e Drejtësisë në favor të Kosovës.
Presidenti i vendit Bamir Topi i telefonoi për t'a uruar homologun e tij kosovar Fatmir Sejdiu. Presidenti Topi e cilësoi vendimin e sotëm si njohje të së drejtës legjitime të popullit dhe institucioneve të Kosovës për të shpallur shtetin e tyre të lirë e të pavarur.
Edhe kryeministri Sali Berisha u shpreh se vendimi i sotëm është historik dhe një kontribut madhor për paqen dhe stabilitetin në Ballkan. Sipas tij gjykata më e lartë e botës faktoi se pavarësia e Kosovës në frymë dhe në gërmë është në përputhje me të drejtën ndërkombëtare. Nga ana e tij ministri i jashtëm Ilir Meta deklaroi se sipas tij vendimi është një rikonfirmim i të drejtës së patjetërsueshme të qytetarëve të Kosovës për liri dhe pavarësi.
Ndërsa kryetari i partisë socialiste Edi Rama u shpreh se kjo eshte dita e dytë më e bukur pas shpalljes së pavarësisë. Përfaqësuesit më të lartë të Tiranës janë të bindur se vendimi i Gjykatës Ndërkombëtare të Drejtesisë do t'i hapë rrugë njohjeve të reja për Kosovën dhe bën thirrje që edhe Serbia të ndryshojë qëndrim e të bashkëpunojë me Prishtinën.
Per Tiranën vendimi i sotem i mbyll përfundimisht rrugën spekullimeve apo ideve për ndarje te Kosovës apo shkëmbime territori.