Agjencia amerkane e hapësirë NASA thotë se anija Atlantis, u shkëput nga Stacioni Ndërkombëtar i Hapësirës.
Astronauti Piers Sellers tha në një lidhje satelitore me gazetarët sot se kishte provuar një kënaqësi të madhe duke eksploruar stacionin, që e përshkroi si “pallat”.
Piloti i anijes, Toni Antoneli, fluturoi me anijen Atlantis përreth stacionit orbital para se të nisej për në Tokë. Ky është misioni i fundit i anijes Atlantis në hapësirë.
Agjencia amerikane e Hapësirës, NASA, tha se anija është planifikuar të ulet në Florida të mërkurën, pesë ditë pasi anëtarët e ekuipazhit përfunduan ecjen e tyre të fundit në hapësirë.
Gjatë misionit, astronautët e Shteteve të Bashkuara transportuan pjesë për një laborator rus që do të përdoret për eksperimente në të ardhmen. Ata instaluan edhe bateri të reja dhe një antenë satelitore në stacionin e hapësirës.
NASA e ka përdorur anijen Atlantis për 25 vjet dhe planifikon edhe dy misione të tjera në hapësirë, duke përdorur anije të tjera.
NASA do të tërheqë flotën e saj të anijeve gjatë këtij viti dhe do të përdorë një strategji të re për eksplorimin e hapësirës në të ardhmen. Partnerët në Stacionin Ndërkombëtar do të përdorin raketa ruse dhe private për të dërguar astronautë dhe furnizime në orbitë.
