Lidhje

Britania, hetim për Litvinenkon


Britania do të ndërmarrë një hetim zyrtar lidhur me vdekjen para shtatë vjetësh të ish-spiunit rus Alexander Litvinenko, por një zëdhënës i kryeministrit David Cameron thotë se ky vendim nuk ka të bëjë aspak me dyshimet për rolin e Rusisë tek rrëzimi i avionit të Malaysia Airlines në Ukrainë javën e kaluar.

Litvinenko kishte qenë agjent rus dhe vdiq pasi kishte gëlltitur polonium radioaktiv 210, duke pirë çaj në një hotel në Londër në vitin 2006. Britania e hetoi vdekjen e Litvinenkos në atë kohë, por pa përcaktuar nëse vetë shteti rus mund të ishte përgjegjës për vrasjen.

Litvinenko kishte shkëputur lidhjet me qeverinë e tij dhe në shtratin e vdekjes kishte akuzuar Presidentin rus se kishte urdhëruar vrasjen e tij.

Vendimi për një hetim zyrtar është një kthesë e konsiderueshme nga ana e qeverisë britanike, e cila më parë i kishte resistuar kësaj ideje me argumentin se nuk donte të bënte publik informacion sensitiv zbulimi.

Hetimi fillon më 31 korrik dhe pritet të vazhdojë deri në fund të vitit 2015.

XS
SM
MD
LG