Pistat dhe stadiumet për garat olimpike verore në Rio de Zhaneiro kanë përfunduar në masën 98% pas inaugurimit javën e kaluar të Stadiumit të Garave Ujore.
Stadiumi i ri, i ndërtuar në Parkun Olimpik Barra do të jetë skenë e garave të notit, për Olimpiket që fillojnë më 5 gusht. Po në këtë objekt do të zhvillohen edhe garat e notit të Lojërave Speciale Olimpike në shtator.
Presidentja Dilma Rousseff ishte e pranishme në ceremoninë e inaugurimit. Drejtori i Kompanisë Olimpike që është përgjegjëse për përgatitjen e terrenit për Lojërat Verore, tha se deri tani Parku Olimpik ka organizuar 20 gara të ndryshme.
Atletët kanë shprehur përshtypje pozitive për pistat. Ka mbetur vetëm velodromi për garat e shpejtësisë me biçikleta, shpjegon zyrtari. Parku Olimpik Barra është pulsi i gjithë aktivitetit olimpik këtë vit, pasi aty do të zhvillohen 16 kategori të Olimpikeve dhe 9 të Lojërave Speciale.
Pas recesionit ekonomik që goditi Brazilin, buxheti për Olimpiket u shkurtua dhe shumë nga projektet për pistat e garave u modifikuan, duke theksuar vlerën e tyre praktike.
Ideja është që pas Olimpikeve stadiumet dhe pistat të modifikohen dhe të përdoren si shkolla, qendra komuniteti, apo objekte për stërvitje fizike.