Qeveria e Kosovës është zotuar që deri në fillim të muajit qershor, të përmbushë kriteret e Komisionit Evropian për liberalizimin e vizave dhe t’i raportojë përparimin këtij komisioni. Gjatë kësaj jave është diskutuar shumë për kohën e shkurtër dhe nevojën për më shumë vullnet politikë për përmbushjen e kritereve. Analistët thonë ndërkaq se mungesa e këtij vullneti ka bërë që Kosova të zvarrisë pjesën e saj të punës posaçërisht në luftimin e krimit të organizuar dhe korrupsionit.