Udhëheqësi i misionit të Fondit Monetar Ndërkombëtarë në Kosovë, Jacques Miniane, tha të hënën në Prishtinë se rritja ekonomike gjatë këtij viti pritet të arrijë në tre për qind, një rritje që nuk siguron mundësi për rritje pagash në sektorin publik e madje as punësim të mjaftueshëm.
Ai i bëri këto komente në përmbyllje të vizitës dyjavëshe të misionit të Fondit Monetar në Kosovë me ç’rast është diskutuar për gjendjen financiare, deficitin buxhetor dhe qëndrueshmërinë e sektorit financiar.
“Ne presim rritje ekonomike këtë vit, për 3 për qind. Kjo nuk është keq. Në fakt është më mirë sesa në shumë shtete tjera në rajon. Por, ne u pajtuam me qeverinë dhe Bankën Qendrore të Kosovës që duhet të ketë një rritje më të lartë sesa 3 për qind për të krijuar vende të reja pune”, tha zoti Miniane, duke nënvizuar se me situatën aktuale “pagat në sektorin publik nuk mund të rriten”. Qeveria tha ai, po përballet me angazhime të konsiderueshme nga viti i kaluar ndërsa në të njëjtën kohë të ardhurat nuk janë rritur aq shpejt.
Ndërsa, ministri i financave Abdullah Hoti, tha se pret që në muajin prill të debatojë me Fondin Monetar për ndonjë marrëveshje të re të financimit të nevojave zhvillimore të Kosovës.
Ndërsa sa u përket pagave ai tha se po punohet në ligjin për këtë çështje që rregullon pagat dhe përfitimet për 80 mijë punonjës në sektorin publik.
“Në Ligjin e ri të pagave, do të vendosim rregull të qartë duke marrë parasysh edhe rekomandimet e FMN-së, një kuadër brenda të cilit në baza vjetore ne i rregullojmë pagat. Vendosim edhe koston e përgjithshme të pagave brenda buxhetit, por duke vendos edhe kritere për rritjen e pagave, në mënyrë që rritja e pagave të mos jetë vendim politik, por të jetë i lidhur më produktivitetin e të punësuarit dhe rritjen ekonomike që ka vendi”, tha ministri Hoti, qeveria e të cilit po përballet me kërkesa të shumta për rritje pagash në sektorin publik.
Kosova shpalli pavarësisë në shkurt të vitit 2008, ndërsa në qershor të vitit 2009 ajo u bë anëtare e Bankës Botërore dhe Fondit Monetar Ndërkombëtarë. Anëtarësimi që vlerësuar me rëndësi për rimëkëmbjen ekonomike të Kosovës e cila përballet me shkallë të lartë të papunësisë dhe rrjedhimisht edhe varfërisë.