Në Kosovë, policia bëri të ditur se ka arrestuar 15 persona në komunën e Shtërpcës, rreth 70 kilometra në jug të Prishtinës, nën dyshimin për kryerjen e veprave penale që kanë të bëjnë me keqpërdorimin e autorizimeve ekonomike dhe shkatërrimin e pyjeve.
Sipas zyrtarëve të policisë, njësitë policore për hetimin e krimeve ekonomike dhe korrupsionit të mbështetur edhe nga inspektorët e Ministrisë së Mjedisit dhe Planifikimit Hapësinor, kanë realizuar një operacion policor të kontrollit për bastisje në një lokacion në komunën Shtërpcës.
Policia tha se të arrestuarit janë të përkatësisë kombëatre serbe.
Autoritetet në Serbi reaguan ashpër ndaj aksionit të autoriteteve në Kosovë, ndërsa bënë të ditur se të arrestuarit janë të përkatësisë etnike serbe, njëherësh punëtorë të Parkut Nacional “Sharri” në Brezovicë.
Në një reagim të shefit të zyrës për Kosovë në qeverinë e Serbisë, Marko Gjuriç thuhet se “ky është një sulm i ashpër në të drejtat themelore të serbëve të Kosovës, shkel çdo gjë që deri tani është arritur në dialogun e Brukselit dhe është provokim ndaj gjithë Serbisë”.
Zoti Gjuriç tha se “ky veprim është i lidhur me përpjekjet e Kosovës për t'u anëtarësuar në UNESCO dhe ishte një përpjekje për të imponuar me forcë pranimin e shpalljes së njëanshme të pavarësisë së Kosovës”.
Komuna e Shtërpcës ndodhet rreth 70 kilometra në jug të Prishtinës dhe është e banuar me shumicë serbe. Në atë zonë shtrihet edhe qendra e skijimit në Brezovicë, më e njohura në Kosovë.