Departamenti amerikan i Mbrojtjes njoftoi se një sulm ajror amerikan ka vrarë kreun e Shtetit Islamik në Libi.
Një deklaratë e zëdhënësit të Pentagonit, Peter Cook, thotë se objektivi i sulmit ishte Abu Nabil, shtetas irakian dhe ish-operativ i al Kaidas.
I njohur ndryshe me emrin Wissam Najm Abd Zayd al-Zubaydi, ishte udhëheqës i lartë i ISIS-it në Libi dhe mendohet se ka qenë zëdhënësi në videon e qarkulluar gjatë këtij viti, ku u tregua ekzekutimi i një grupi të krishterësh.
Zoti Cook tha se “vdekja e Nabilit do të ulë aftësitë e grupit për të arritur objektivat e tij në Libi, përfshirë rekrutimin e anëtarëve të rinj, krijimin e bazave në Libi dhe planifikimin e sulmeve terroriste ndaj Shteteve të Bashkuara. Ky nuk është sulmi i parë amerikan kundër terroristëve në Libi, por është sulmi i parë ndaj një udhëheqësi të atjeshëm të ISIS-it, dhe dëshmon se ne do t’i ndjekim udhëheqësit e Shtetit Islamik kudo që të veprojnë.”
Zoti Cook informoi se operacioni kundër Nabilit ishte autorizuar dhe filluar përpara sulmeve terroriste në Paris.