Përfaqësues të bashkësisë ndërkombëtare në Kosovë thanë sot se nuk do të ndërhyjnë në gjetjen e zgjidhjes për krijimin e institucioneve të reja të Kosovës. Ata thanë se Kosova është duke kaluar në një proces demokratik dhe jo në një krizë institucionale. Të enjten e ardhshme më 18 shtator pritet të mbahet mbledhja e Parlamentit të Kosovës, për të zgjedhur udhëheqjen e tij, që është kusht për ngritjen e institucioneve në bazë të zgjedhjeve parlamentare të tetë qershorit. Por, ende është e paqartë nëse kjo mbledhje do të gjejë ndonjë zgjidhje për ngërçin politik për shkak të qëndrimeve tërësisht të kundërta të partive politike në Kosovë.