Panetta, deklaratë për gjeneralin Allen

Sekretari amerikan i Mbrojtjes Leon Panetta tha se vazhdon të ketë besim se gjenerali John Allen do të mbetet komandanti i forcave amerikane në Afganistan, pavarësish lidhjes së tij në një skandal që detyroi shefin e CIA-s David Petraeus të japë dorëheqjen.
 
Panetta bëri deklaratën e parë publike lidhur me incidentin sot në Australi ku po merr pjesë në bisedimet strategjike dypalëshe.
 
Gjenerali Allen po hetohet pasi FBI-ja zbuloi 20 deri në 30 mijë fletë komunikimi që përfshin atë dhe Jill Kelleyn. Hetimi po përqëndrohet në çështjen në se mesazhet kanë qënë të papërshtatshme.
 
Kelley u ankua tek FBI-ja rreth emaileve kërcënuese që po merrte nga biografia Paula Broadwell e cila kishte patur marrëdhënie jashtë martesore me gjeneralin Petraeus. Hetimi çoi në dorëheqjen e shefit të CIAs.
 
Sekretari Panetta paralajmëroi gazetarët se askush nuk duhet të nxitojë të nxjerr ndonjë përfundim lidhur me këtë çështje.