Policia në Turqi bastisi sot disa media në të gjithë vendin, duke arrestuar 24 përkrahës të një rivali të Presidentit Rexhep Tajip Erdogan.
Operacioni ishte urdhëruar nga zoti Erdogan, i cili ishte zotuar një ditë më parë se do të mposhtëte "rrjetin e tradhtisë duke e detyruar këtë rrjet të paguante," sipas fjalëve të tij. Arrestimet kishin në shënjestër përkrahësit e klerikut musliman Fethullah Gulen, i cili jeton në Shtetet e Bashkuara që nga viti 1999.
Zoti Erdogan, i cili fitoi zgjedhjet presidenciale të muajit gusht, e ka akuzuar klerikun se ka orkestruar hetimet për korrupsion një vit më parë kundër personave të rëndësishën në rrethin e tij të brendshëm. Tre ministra dhanë dorëheqjen në atë kohë, por përfundimisht akuzat u rrëzuan dhe kleriku Gulen mohon se ka qenë prapa hetimeve për ryshfet.
Mes të arrestuarve ishte edhe Ekrem Dumanli, kryeredaktor i gazetës Zaman, më e shitura në Turqi.