Në Shqipëri, pas vitit 1990, pjesa më e madhe e instituteve të kërkimit shkencor u mbyllën dhe vetëm një pjesë e vogël, mundën të rezistonin, duke u shndërruar në qendra më të vogla të kërkimit shkencor. Mes tyre edhe Instituti i Misrit dhe Orizit në Shkodër, i cili gradualisht u shndërrua në Qendër të Transferimit të Teknologjive. Megjithë mungesën e specialistëve dhe mjeteve të nevojshme, në këtë Qendër po bëhen përpjekje për vazhdimin e programeve të trasheguara nga Instituti i Misrit dhe Orizit si dhe për krijimin e linjave dhe hibrideve të reja të misrit për nevojat e prodhimit vendas.