Lidhje

SHBA: Qeveria u jep gabimisht shtetësinë qindra emigrantëve


Qeveria amerikane u ka dhënë gabimisht shtetësinëmë shumë se 800 emigrantëve që duhej të ishin dëbuar.

Një auditim i brendshëm i Departamentit të Sigurisë, bërë publik të hënën, zbuloi se 858 emigrantët që morën shtetësinë gabimisht, janë nga vendet që përbëjnë rrezik kombëtar për Shtetet e Bashkuara ose nga vende me përqindje të lartë të mashtrimit në dokumentat e emigracionit. Raporti nuk i ka identifikuar këto vende.

Inspektori i Përgjithshëm i Departamentit të Sigurisë Kombëtare, John Roth tha se emigrantët përdorën emra të ndryshëm ose data të lindjes jo të sakta për të aplikuar për shtetësinë amerikane. Ai tha se gabimet për dhënie shtetësie ndodhën sepse shenjat e gishtave të aplikuesve nuk ishin në sistemin e të dhënave qeveritare.

"Kjo situatë krijoi mundësi për individët që të fitonin të drejtat dhe privilegjet e shtetësisë amerikane me anë të mashtrimit", tha zoti Roth.

Të paktën tre prej atyre që u është dhënë gabimisht shtetësia ishin në gjendje të përdornin statusin e tyre për të filluar punë në fusha të sigurisë sensitive, duke përfshirë punën në aeroporte dhe objekte detare. Departamenti i Sigurisë Kombëtare thotë se këtyre personave tashmë u janë hequr kredencialet e tyre të sigurisë.

Një person i katërt është bërë polic.Vitin e kaluar hetuesit identifikuan gjithashtu 953 raste që duken të dyshimta.

Departamenti i Sigurisë Kombëtare thotë se raporti ve në pah,atë që ka qenë prej kohësh,një sfidë e vështirë për zyrtarët e imigracionit - faktin se të dhënat e shenjave të gishtave vite të shkuara kanë qënë në letër dhe nuk mund të kërkohen në mënyrë elektronike.

Raporti rekomandon që shenjat e gishtave që janë në letër të dxhitalizohen dhe të shtohen në bazën e të dhënave të qeverisë. Ai gjithashtu rekomandon krijimin e një sistemi për vlerësimin e qindra njerëzve të cilët janë miratuar gabimisht për shtetësi.

Akuza janë paraqitur në vetëm dy raste. Në kërkesën e tyre emigrantët duhet të përfshijnë edhe emra që kanë përdorur më parë, si dhe historinë e tyre të emigracionit, por shpesh herë ata nuk e përfshijnë këtë informacion.

Kandidati republikan për president, Donald Trump e ka bërë verifikimin e emigrantëve si pjesë qendrore të platformës së tij. Ai ka bërë thirrje për një ndalim të përkohshëm të emigracionit nga vendet e komprometuara nga terrorizmi deri sa një proces i fortë verifikimi të mund të zbatohet.

XS
SM
MD
LG