Lidhje

Intensifikohet hetimi ndaj Rusisë


Hetimet mbi një bashkëpunim të mundshëm mes njerëzve të fushatës së Presidentit Trump dhe Rusisë është intensifikuar në javët e fundit. Ka patur pranime të tjera fajësia dhe janë ngritur padi ndaj13 shtetasve rusë për ndërhyrje në zgjedhjet e vitit 2016. Megjithëse rezultati i hetimit mbetet i paqartë, kjo çështje pritet të shdërrohet në një problem të madh për zgjedhjet e këtij viti për në Kongres. Korrespondenti i Zërit të Amerikës Jim Malone njofton nga Uashingtoni.

Këshilltarja e presidentit Hope Hicks ishte e fundit që dëshmoi përpara një komisioni të Kongresit që po heton lidhur me ndërhyrjen e Rusisë në zgjedhje.

Ajo nuk pranoi t'i përgjigjej disa pyetjeve, duke i zhgënjyer demokratët.

"Ky nuk është privilegj ekzekutiv. Ky është refuzim ekzekutiv", tha ligjvënësi demokrat Adam Schiff.

Hetimi për ndërhyrjen ruse që drejtohet nga Prokurori i Posaçëm Robert Mueller është intensifikuar javët e fundit. Të mërkurën, ish-kryetari i fushatës së Donald Trumpit, Paul Manafort, u deklarua i pafajshëm për akuza, që përfshijnë dhe pastrimin e parave.

Javën e kaluar ish-zëvendësi i tij Rick Gates, pranoi fajësinë se pati gënjyer prokurorët dhe tashmë po bashkëpunon me autoritetet.

Në një seri postimesh në Twitter, Presidenti Trump kritikoi edhe një herë hetimin duke e cilësuar atë "gjueti shtrigash".

"Ata kanë hedhur këtë re të rreme mbi administratën. Kjo ka dëmtuar qeverinë tonë. Ky është një mashtrim i demokratëve"

Demokrati më i lartë i komisionin të Senatit për Zbulimin Mark Warner ka mendim tjetër.

"Kjo është gjëja më e rëndësishme e gjithë karrierës time publike. Nxjerrja e së vërtetës është jashtëzakonisht e rëndësishme".

Hetimi për ndërhyrjen ruse ka hedhur një re mbi Shtëpinë e Bardhë, thotë analisti Costas Panagopoulos.

"Mendoj se është një kërcënim i madh. Nuk e dimë se çfarë do të dalë nga hetimet. Nuk e dimë se sa serioze do të jenë këto gjetje për presidentin".

Shqetësimet lidhur me hetimin mund të dëmtojnë më tej vlerësimet historikisht të ulëta të miratimit për presidentitn Trump, ndërsa Kongresi përgatitet për zgjedhjet e këtij viti, thotë John Hudak.

"Nëse republikanët humbasin Dhomën e Përfaqësuesve apo Senatin në 2018, do të ishte një përfundim tragjik për dy vitet e fundit të mandatit të parë të Trumpit".

Por sipas analistit konservator Michael Barone, deri më tani, hetimi duket se ka patur pak ndikim tek mbështetësit kryesorë të presidentit Trump.

"I ashtuquajturi hetim ndaj Rusisë ka patur shumë pak ndikim ndaj presidentit Trump dhe administratës së tij, nga sa kundërshtarët e tij do të donin të ishte".

Për momentin, për presidentin, si dhe për gjithë të tjerët, mbetet e paqartë, se kur do të përfundojnë hetimet dhe çfarë mund të dalë prej tyre.

Facebook Forum

XS
SM
MD
LG