Lidhje

Kavanaugh fillon detyrën si anëtar i Gjykatës së Lartë


Anëtari më i ri i Gjykatës së Lartë të Shteteve të Bashkuara Brett Kavanaugh, filloi të martën detyrën e re në trupën më të lartë gjyqësore të vendit. Pas një procesi konfirmimi në Senat, të shoqëruar me shumë debate, që e ndanë vendin në dy kampe, ai u zotua se do ta konsiderojë çdo çështje që i shkon gjykatës, me respekt dhe me mendje të hapur.

Gjyqtari Kavanaugh foli për synimet e tij, pas një ceremonie në Shtëpinë e Bardhë.

"Çdo amerikan mund të ndjehet i sigurtë se unë do të jem një gjykatës i pavarur e i paanshëm, i përkushtuar ndaj çdo procesi drejtësie të lirë dhe të bazuar në ligj.”- tha zoti Kavanaugh

Analistët e pavarur të gjykatës parashikojnë se Kavanaugh mund të pajtohet me interpretimet më konservatore të ligjit, duke e ndarë gjykatën sipas prirjes ideologjike në raportin 5-4, në favor të anëtarëve që anojnë nga e djathta.

Para se të bënte betimin, Presidenti Trump i kërkoi falje zotit Kavanaugh dhe familjes së tij, duke aluduar për hetimin ndaj akuzave se kishte sulmuar seksualisht një vajzë në vitet e shkollës së mesme.

Kavanaugh i mohoi akuzat e vajzës, Christine Blasey Ford, tani profesoreshë universiteti në Kaliforni.

"Në emër të vendit tonë, i kërkoj falje Brett-it dhe të gjithë familjes Kavanaugh, për dhimbjen e tmerrshme dhe vuajtjen që u detyruat të kaloni, një hetim historik, që provoi se ishit i pafajshëm,”- tha Presidenti Trump.

Në fakt, shqyrtimi nga FBI-ja i akuzave, nuk ishte një hetim kriminal dhe raporti i saj nuk arriti në përfundim nëse ai ishte, apo jo fajtor.

Kavanaugh bëri zyrtarisht betimin të shtunën, menjëherë pasi Senati e miratoi kandidaturën e tij me rezultatin e ngushtë 50-48, për në vendin e përhershëm në gjykatën më të lartë të vendit.

Pak orë para ceremonisë së të hënës në mbrëmje në Shtëpinë e Bardhë,

Presidenti Trump e akuzoi opozitën demokrate për komplot, për të mos e lejuar zotin Kavanaugh të bëhej anëtar i Gjykatës.

Facebook Forum

XS
SM
MD
LG