Gjenerali amerikan i Gardës Kombëtare të Ajovës, Timothy Orr, po qëndron për një vizitë në Kosovë në prag të pensionimit të tij. Ai bashkë me një delegacion amerikan takuan të martën gjatë ditës udhëheqësit e Kosovës, të cilët vlerësuan lartë mbështetjen amerikane në proceset politike në Kosovë.
Një vizitë e planifikuar e gjeneralit amerikan Orr në Kosovë në muajin shkurt me rastin e përvjetorit të pavarësisë, ishte anuluar për shkak të tarifave të Kosovës ndaj prodhimeve serbe dhe refuzimit të qeverisë për të dëgjuar këshillat amerikane për pezullimin e tyre.
Garda Kombëtare e Ajovës ka luajtur rol të jashtëzakonshëm në ngritjen e mundësive vepruese të Forcës së Sigurisë së Kosovës shndërrimi i së cilës në ushtri është mbështetur nga Shtetet e Bashkuara, por ka nxitur pakënaqësi tek një pjesë e aleatëve të NATO-s.
Kosova dhe Ajova kanë nënshkruar marrëveshje të ndryshme bashkëpunimi posaçërisht në fushën ushtarake. Në vitin 2013 Kosova dhe shteti i Ajovës nënshkruan marrëveshje të partneritetit të ndërsjellë në përpjekje për thellimin e bashkëpunimit ndërmjet dy vendeve.
Facebook Forum