Të premten në Hong Kong protestuesit rrethuan stacionin e policisë, duke i kërkuar autoriteteve policore të kërkojnë falje për trajtimin e personave të arrestuar gjatë protestës kundër projektligjit të debatueshëm mbi ekstradimin.
Policia u përpoq t'i bindë demonstruesit të largohen, duke thënë se ata po ndërhynin ndaj shërbimit policor për publikun.
Më herët gjatë ditës së premte, qindra studentë protestues u mblodhën jashtë Këshillit Legjislativ të Hong Kongut, të cilin qeveria e kishte mbyllur.
Protestuesit po përpiqen të mbajnë nën presion qeverinë e drejtuar nga Carrie Lam e cila vendosi vetëm ta pezullojë por jo ta tërheqë përfundimisht ligjin që do të lejonte ekradimin për procese gjyqësore në Kinë.
Të premten protestuesit bllokuan përkohësisht autostradën kryesore e cila të shpie drejt Këshillit Legjislativ.
Demonstratat e së premtes janë përgjigja e studentëve nëse qeveria nuk heq dorë tërësisht nga ligji për ekstradimin. Studentët kërkojnë gjithashtu lirimin e të gjithë protestuesve të arrestuar, rrëzimin e akuzave kundër tyre si dhe kryerjen e një hetimi mbi përdorimin e forcës nga policia gjatë protestave të fundit. Qeveria nuk u është përgjigjur drejtpërdrejt këtyre kërkesave.
Të martën, udhëheqësja e Hong Kongut Carrie Lam, një mbështetëse e politikave pro-Pekinit, kërkoi falje për krizën politike dhe trazirat e nxitura nga ligji i propozuar.
Facebook Forum