Në pikën kufitare të Kakavijes disa mijëra emigrantë shqiptarë që po kthehen nga Greqia, janë shprehur me skepticizëm për ligjin e emigracionit, që eshte paraqitur së fundmi nga qeveria greke në Parlamentin e këtij vendi. Sipas tyre, edhe më parë u janë berë shqiptarëve premtime, por ato nuk janë realizuar në një kohë të shpejtë në praktikë.
Emigrantet i thanë Zërit të Amerikës se kërkojnë praktika më të lehtësuara në procesin e legalizmit dhe leje qendrimi më të gjata. Një numer i madh emigrantësh thonë se do të kthehen në Shqiperi për votimet e 3 korrikut për të shprehur vullnetin e tyre politik. Por autoritetet greke dhe shqiptare duhet t’u mundesojnë atyre lëvizjen në kufi dhe udhëtimin me kosto me të ulet, thonë emigrantet.
Nje zgjidhje e mirë, sipas tyre, do të ishte që ata të lejoheshin të mund tëlëviznin me rastin e zgjedhjeve me leje-qendrimet e vjetra.
Ardhja e imigranteve nga Greqia për zgjedhjet parlamentare te 3 korrikut shihet me mjaft interes nga forcat politike shqiptare. Drejtuesit kryesorë të partive u kanë bërë thirrje emigrantëve të kthehen për votime. Kthimi i tyre mund te ketë ndikim në rezultatet e zgjedhjeve, veçanërisht për disa zona në jug të Shqipërisë me më tepër emigrantë, si dhe nga pjesemarrja e ulët e zgjedhësve në votimet e kaluara. //az//