Lidhje

Ushtria Republikane Irlandeze zotohet t’i japë fund fushatës së armatosur


Ushtria Republikane Irlandeze njoftoi se do t’i japë fund fushatës së saj të armatosur kundër sundimit britanik dhe se do të përpiqet për realizimin e objektivave të saj me mënyra paqësore. Kjo organizatë e jashtëligjshme tha se veprimtaritë e saj ushtarake do të përfundojnë prej ditës së sotme.

Ajo u bëri thirrje ekstremistëve të saj për të punuar në mënyrë paqësore drejt arritjes së programeve politike dhe demokratike. Kryeministri Tony Blair tha se vendimi i Ushtrisë Republikane Irlandeze është një hap i pashembullt në historinë e kohëve të fundit të kësaj organizate. Edhe kryeministri irlandez Bertie Ahern si dhe Shtëpia e Bardhë përshëndetën njoftimin.

Gerry Adams, udhëheqësi i Shin Feinit, krahu politik i Ushtrisë Republikane Irlandeze, tha se ky vendim do të ndihmojë në rigjallërimin e procesit të paqes. Ushtria Republikane Irlandeze shprehu besimin se kryengritja e saj e armatosur ishte e ligjshme, por shtoi se ekziston një alternativë për t’i dhënë fund sundimit britanik në Irlandën e Veriut dhe për të arritur bashkimin me Irlandën.

Ushtria Republikane Irlandeze fajësohet për vdekjen e 1 mijë e 800 njerzve gjatë fushatës së saj të armatosur, e cila vazhdoi për më shumë se 3 dekada. Që nga viti 1997 ajo kishte shpallur armëpushimin.

Ndërkaq, Shtëpia e Bardhë e cilësoi njoftimin e Ushtrisë Republikane Irlandeze si një vendim të rëndësishëm, që mund të ketë vlera historike.

Zëdhënësi i Shtëpisë së Bardhë Scott McClellan tha se njoftimi duhet të pasohet tani me vepra që tregojnë se Ushtria Republikane Irlandeze është e angazhuar për të respektuar ligjin dhe për të dënuar veprimtaritë kriminale dhe ushtarake.

Zëdhënësi tha se Shtetet e Bashkura janë të vendosura për të mbështur procesin e paqes në Irlandën e Veriut.

XS
SM
MD
LG