Autoritetet britanike ndaluan dhe kanë në plan të dëbojnë nga vendi 10 shtetas të huaj që dyshohet se përbëjnë kërcënim për sigurinë kombëtare. Sekretari i Brendshëm Charles Clarke e bëri njoftimin sot, por nuk i bëri të njohura identitetet e tyre.
Burime qeveritare konfirmuan se mes të ndaluarve është Abu Qatada, i cili kërkoi strehim në Britani duke thënë se persekutohej në Jordani. Autoritetet britanike e kanë cilësuar atë si rekrutuesin më të lartë të Al-Kaidës.
Pas sulmeve me bomba në Londër, Kryeministri Tony Blair shpalli një sërë masash në kuadrin e luftës kundër terrorizmit. Një nga këto masa është dëbimi i të huajve që mbështesin dhunën. Ndërkohë, autoritetet në Liban kanë ndaluar klerikun fondamentalist islamik Omar Bakri Mohammed që është nën hetim në Britani për akuza të lidhura me terrorizmin.
Ai u largua nga Britania javën e kaluar pasi shkaktoi zemërim me deklaratën se nuk do të informonte autoritetet, në se do të kishte njohuri për myslimanë që bënin plane për sulme me bomba.