Nënpresidenti amerikan Dik Çejni shprehu mbështetje ndaj përpjekjeve të Shqipërisë, Kroacisë dhe Maqedonisë për t’u anëtarësuar në NATO dhe në Bashkimin Evropian. Nënpresidenti i bëri komentet sot në Dubrovnik të Kroacisë gjatë samitit të vendeve të Kartës së Adriatikut, ku bëjnë pjesë të tre këto vende ballkanike. Ai tha se anëtarësimi i tyre në NATO dhe në Bashkimin Evropian do të ndihmonte për t’i “rinuar” të dyja këto organizata. Zoti Çejni gjithashtu lavdëroi të tre këta vende për bashkëpunimin me trupat e NATO-s dhe ato amerikane në Afganistan dhe Irak.
Nënpresidenti Çejni falenderoi Kroacinë për kontributin e saj ndaj forcës së NATO-s në Afganistan dhe i përshëndeti aspiratat për t’u anëtarësuar në aleancën atlantike.
"Ne e mbështesin me forcë Kroacinë në përpjekjet e saj për t’u bërë anëtare me të drejta të plota e komunitetit ndëratlantik, si në kuptimin e bashkëpunimit me NATO-n ashtu edhe me komunitetin evropian”, tha zoti Çejni.
Më pas Nënpresidenti amerikan u takua me kryeministrat e Shqipërisë dhe të Maqedonisë të cilët shprehën dëshirën për t’u pranuar sa më shpejt në NATO dhe në Bashkimin Evropian.
"Anëtarësimi në NATO është një objektiv strategjik i vendit tim,” tha në konferencë Kryeministri kroat Ivo Sanader.
Ndërsa Kryeministri Berisha tha:
"Ne e shikojmë anëtarësimin në NATO si përparësi kryesore dhe për këtë qeveria ime është gati të të marrë çdo vendim dhe të paguajë çdo çmim për të venë në zbatim planin e veprimit për anëtarësimin në NATO. Gjatë këtyre 15 vjetëve Shqipëria ka treguar një partneritet të vërtetë dhe të palëkundur ndaj NATO-s. Ajo do të jetë kudo që është dhe do të jetë NATO-ja, kudo që janë dhe do të jetë Shtetet e Bashkuara, në mbrojtje të lirive dhe vlerave të përbashkëta," tha Kryeministri Berisha.
Ndërsa Kryeministri maqedonas Vllado Buçkovski tha se në vetëm katër vjet, Republika e Maqedonisë është transformuar nga një konsumatore e NATO-s dhe e ndihmës së re për sigurinë në një kontribuese e sigurimit të ri atlantik. Zoti Çejni e vizitoi Kroacinë në kuadrin e një turneu që përfshinte tre vende. Gjatë vizitave ai u takua me udhëheqës të më shumë se dhjetë vendeve, shumica e tyre në Evropë.
Gjatë turneut dhe bisedimeve të tij ai e vuri theksin te reformat demokratike në vendet që gjatë Luftës së Ftohtë kanë qenë ose pjesë e ish Bashkimit Sovjetik ose jashtë ndikimit të drejtpërdrejtë të Kremlinit. Shtetet e Bashkuara ka vite që i inkurajojnë aspiratat e Kroacisë, Shqipërisë dhe Maqedonisë për t’u pranuar në NATO.//lk