Presidenti Bush po përpiqe të qetësojë tregjet financiare pas rënieve të theksuara të disa ditëve të fundit. Gjatë një konference shtypi në Shtëpinë e Bardhë, Presidenti përmendi sot të dhënat pozitive ekonomike.
Ndërsa luhatjet e fundit të tregut amerikan të aksioneve duket se po trondisin besimin e investitorëve si brenda edhe jashtë vendit, Presidenti Bush solli si shembuj pozitivë të dhënat që tregojnë rritjen e ekonomisë amerikane me një ritëm vjetor prej 3,4 përqindësh në vit, për tremujorin e dytë të vitit.
Gjatë një konference shtypi, pas takimit me këshilltarët e tij për ekonominë, Presidenti i bëri thirrje amerikanëve ta analizojnë mirë ekonominë e vendit të tyre.
“Vendet e punës janë shtuar ndjeshëm, ashtu siç pritet nga një ekonomi e fortë, e qëndrueshme dhe fleksibël. Papunësia është e ulët dhe pagat po shtohen.”
Presidenti tha se merita për këtë i takon sistemit të lirë, e sipërmarrës amerikan, si dhe gjendjes së mirë të ekonomisë globale që po ble mallra amerikane.
Tregjet financiare amerikane kanë përsuar rënie të ndjeshme për shkak të shqetësimve nga dobësimi i vazhdueshëm i sektorit të shitblerjes së shtëpive, si dhe nga problemet e shumta me sistemin e kreditimit të shtëpive, sidomos për kreditë që përmbajnë rrezik të lartë. Shqetësimet rreth dobësisë së dollarit po ashtu kanë ndikuar në shitjet e mëdha në bursë, që bënë që treguesi më i njohur i saj, Dow Jones, që përfaqëson mesateren e 30 kompanive më të mëdha amerikane, të bjerë me 600 pikë këtë javë. //kk//