Autoritetet pakistaneze thonë se kanë ndaluar më shumë se 700 përkrahës të ish kryeministrit Navaz Sharif, në prag të kthimit të tij nga mërgimi.
Zoti Sharif, i cili u rrëzua me anë të grusht shtetit të kryesuar nga gjenerali Pervez Musharaf në vitin 1999, tha se do të kthehet në Pakistan nesër.
Qeveria pakistaneze ka shtuar masat e sigurisë dhe ka ndaluar grumbullimin e njerëzve në pritje të kthimit të ish kryeministrit Sharif.
Qeveria ka filluar ndalimin e mbështetësve të zotit Sharif. Partia e tij ka thënë se më shumë se 2 mijë njerëz janë arrestuar. Ndërsa zyrtarët qeveritarë thonë se janë ndaluar 700 persona.
Kthimi i zotit Sharif shikohet si një sfidë serioze për presidentin Musharaf, i cili shpreson të rifitojë në zgjedhjet e ardhshme, por ka humbur pjesën më të madhe të mbështetjes që kur u përpoq të shkarkonte kryetarin e Gjykatës së Lartë të vendit në muajin mars. //ze//