Shtetet e Bashkuara kanë theksuar se mbështesin zhvillimin në Maqedoni të një procesi zgjedhor të drejtë, dhe janë asnjanëse ndaj kandidatëve.
Ambasada e amerikane në Shkup theksoi qëndrimin amerikan, pas njoftimeve të kohëve të fundit se disa parti politike në Maqedoni kanë angazhuar "ekspertë nga Shtetet e Bashkuara" për t'i ndihmuar me fushatat zgjedhore.
Ambasada sqaron përmes një deklarate se ekspertët që mund të angazhojnë partitë politike janë qytetarë privatë amerikanë, të cilët punojnë si konsulentë. Qeveria e Shteteve të Bashkuara, thekson më tej deklarata e ambasadës, nuk mbështet asnjë parti politike apo kandidat në veçanti.
Ndërkohë, Presidenti gjerman Horst Keler i cili ndodhet për vizitë në Shkup, shpreson në gjetjen e një kompromisi midis Greqisë dhe Maqedonisë lidhur me çështjen e emrit.
Presidenti Keler shprehu mbështetjen gjermane për integrimin e Maqedonisë në strukturat euroatlantike. Të enjten në Shkup duhet të arrijë edhe ndërmjetësi i Kombeve të Bashkuara për çështjen e emrit, Mathew Nimitz. //bsa//
