Papa Benedikti dha një meshë në qiell të hapur për dhjetra mijëra njerëz në Uashington gjatë turneut të parë që ai bën si Papë në Shtetet e Bashkuara.
I veshur me një veladon të kuq, Papa u tha rreth 45 mijë besimtarëve të mbledhur në stadiumin e ri të bejsbollit Nationals Park, se Kisha Katolike është në udhëkryq.
Ai shprehu shqetësim për atë që e quajti prishje të bazave të shoqërisë dhe që përfshin tjetërsimin e njerëzve, dhunën dhe mospërfilljen në rritje ndaj Zotit.
Papa Benedikt u bëri thirrje udhëheqësve të Kishës katolike të promovojnë më mirë besimin dhe unitetin në një kulturë që sa vjen e bëhet më laike dhe materialiste.
Papa shprehu gjithashtu keqardhje rreth abuzimeve seksuale me fëmijët nga priftërinjtë në Shtetet e Bashkuara gjatë dekadave të fundit.
Ai foli në anglisht dhe pak në spanjisht, duke iu drejtuar numrit në rritje të hispanikëve katolikë në vend.
Në ceremoni interpretoi edhe ylli i operas Placido Domingo.
Papa do të shkojë nesër në Nju Jork, ku do të flasë në Kombet e Bashkuara dhe do të japë një meshë në stadiumin Yankee. Ai do të vizitojë Kuotën Zero, vendin ku dikur ngriheshin kullat binjake të shkatërruara nga terroristët e al-Kaidës më 11 shtator 2001. //ii