Serbia thotë se ka vendosur t’i rikthejë ambasadorët e vet në vendet e Bashkimit Evropian që kanë mbështetur pavarësinë e Kosovës.
Ministri i Jashtëm serb Vuk Jeremiç tha se qeveria e tij vendosi kthimin e ambasadorëve duke gjykuar se ky hap do ta ndihmojë Beogradin në përpjekjet për anëtarësim në Bashkimin Evropian.
Data e rikthimit të ambasadorëve nuk është bërë e njohur. Diplomatët serbë u thirrën në muajin shkurt nga 40 ambasada, pas shpalljes së pavarësisë nga Kosova.
Rikthimi i diplomatëve, krahas me arrestimin në Beograd të hënën të Radovan Karaxhiç, u vlerësua nga udhëheqësit evropianë. Britania e cilësoi arrestimin si një provë që qeveria e re pro-perëndimore e Beogradit i kushton rëndësi lidhjeve më të ngushta me Perëndimin.
Ministrat e BE-së, po
ashtu e përshëndetën arrestimin e Karaxhiçit, duke thënë se ky veprim mund t’i
hapë rrugën anëtarësimit të vendit në BE. //ii